.
.
مقابلة خاصة بالتوعية الصحية /مهم جدا/ -->

مقابلة خاصة بالتوعية الصحية /مهم جدا/


 مقابلة خاصة بالتوعية الصحية


ملاحظة  : تم استخدام اللغة العامية أثناء كتابة المعلومات وذلك لتسهيل وصول المعلومة بشكل مبسط أكثر واسهل


مهارات التواصل والعمل الميداني :

اول شي بالمقابلة خليك طبيعي بحيث ما يظهر عليك توتر وارباك وقعدتك جلستك تكون نظامية وما تهز برجلك او تشبك ايديك ببعضن

- اول شي ممكن تنسئل عن حالك انو احكيلنا عن حالك شوي : بتحكي عن اعمالك السابقة ومع اين منظمة اشتغلت واديش كانت المدة وشو كانت طبيعة عملك

- بعدين ممكن يسئلوك انت شو هدفك او ليش قدمت عالتوعية الصحية: اذا كنت مشتغل بهاد المجال من قبل وعندك خبرة

بكل بساطة بتجاوبهن انو انت عند خبرة بهاد المجال ومشتغل فيه وانك بتقدر تقدم شي جديد للبرنامج من خلال خبراتك

ومهاراتك يلي بتمتلكها واذا ما كنت مشتغل ولا مرة بمجال التوعية الصحية بتقلن انو عندك فكرة واسهة في عمل التوعية

الصحية وانك قادر تنفذ كل المهام والاعمال يلي بتنطلب منك طبعا اذا بدك تحكي هاد الحكي لازم يكون عندك فكرة مسبقة عن عمل برنامج التوعية الصحية وشو هدف البرنامج بشكل عام

- ممكن يسئلوك انت رحت تعمل زيارة او جلسة وشفت انو في مشكلة بالبيت او بالخيمة يلي بدك تزورها وفي صراخ

ومشكلة بهاد البيت يلي قصدتو لتعمل فيه توعية صحية, بتفوت بتعمل جلسة توعية ولا شو بتتصرف ؟ بتقلن لا بس

بسجل عنوان الخيمة او البيت بالتفصيل على ورقة وبرجع عليه بوقت تاني لانو مو معقول في توتر بهاد البيت وادخل انا اعمل توعية صحية

- واذا سئلوك انت رحت تعمل جلسة توعية شو بتعمل وقت بدك تدخل عالبيت: اول شي بتدق الباب او بتنادي اصحاب

الخيمة مين من طلع اول شي بتعرفو على حالك وعلى اسم منظمتك وشو هوي شغلتك وليش انت جاي لعندهن وبتاخد اذن بالدخول لاجراء الجلسة واذا رفضو صحاب البيت او الخيمة تدخل لعندهن وما بدهن توعية صحية طبعا بعد ما تعرف عن حالك وعملك ومنظمتك وليش انت جاي لعندهن اذا رفضو بتتشكرهن وبتحاول تجي بوقت تاني ممكن يستقبلوك او ممكن حدا يطلع يستقبلك غير الشخص يلي استقبلك المرة الماضية ورفض انك تدخل

- هلق الصعوبات يلي ممكن تواجهك بعملك: 

اول شي ممكن تواجه رفض من قبل العائلة باعطاء توعية

صحية , هون قلنا انك بعد ما تعرف عن حالك اذا رفضو تدخل بتسجل عنوان الخيمة كمان وبترجع بوقت تاني واذا رجعت بوقت تاني وكمان رفضو ممكن تبلغ مشرفك ممكن مشرفك المباشر يبعت حدا من زملائك يرجع يزورهن

-وممكن يواجهك اي شخص من المخيم بيكون معصب من شي شغلة وطالعة اخلاقو وممكن تتعرض للشتم : هون ما بترد بأي كلمة وما بتحاول تهدي الشخص المعصب وبتحاول تنسحب بكل سهولة من الموقف وبتبلغ مشرفك المباشر هلق بالنسبة للمشاكل يلي بتتعرضلها اي مشكلة اي شي بيصير معك لازم تخبر مشرفك المباشر عليها وما بيصير تتجاوزمشرفك المباشر وتروح تخبر يلي اعلى منو

- هلق العيلة يلي بدك تزورها ما بتحاول تفرجيهن انك موظف وضاربهن منية انك جاي تقدملهن خدمة بالعكس خليك كتير متواضع وبسيط وانو هاد حقن و الخدمة يلي بدك تقدملهن ياها هاد حقن وما الك أي فضل عليهن بغض النظر عن الخدمة يلي بدك تقدمها

- واذا كنت عبتعمل جلسة واهل البيت او الخيمة طلعو من الموضوع يلي عبتحكي فيه حاول ما تقاطعهن وشوي شوي حاول ترجع لموضوعك الاساسي يلي هوي موضوع التوعية يلي عبتحكي فيه ولكن كمان بطريقة لطيفة ومهذبة ما بتقلن

انو مو هاد موضوعنا وما تحسسن انو الحكي يلي عبيحكوه ما الو قيمة او سخيف يعني اذا انت عبتعمل جلسة وصارو اهل البيت يشكولك انو مافي مساعدات غذائية او اي مساعدة مادية انت بتحاول تفهمهن انو انت عامل توعية صحية وما بتقدم اي نوع من المساعدات المادية او الغذائية ولكن بطريقة لطيفة

- موضوع الامن والسلامة: 

اذا انت عبتشتغل بمنطقة ما وصار فيها مشكلة وتطورت المشكلة لاطلاق نار

انت هون بتنسحب من المنطقة وبتبلغ مشرفك المباشر

- هلق منجي عموضوع التوعية الصحية:

اول شي رح تنسئل ما هي التوعية الصحية او عرف التوعية الصحية

التوعية الصحية هي نهج مخطط الغرض منه مساعدة الناس على اتخاذ القرارات والتدابير الصحيحة اللازمة للوقاية من الامراض التي يمكن ان تنتقل عن طريق العدوى او عن طريق الماء والاصحاح والنظافة


- كيف تنتقل العدوى

العدوى تنتقل من انسان الى انسان او من حيوان الى انسان عن طريق التماس المباشر او غير مباشر

  • التماس المباشر عن طريق المصافحة او استخدام ادوات المريض او سوائل الجسم كنقل الدم مثلا
  • غير مباشر عن طريق العطاس او البصق او البرا ز

- اهم الامراض ومواضيع التوعية الصحية يلي بدك تحكي فيها اثناء الزيارة؟

 هي الامراض المعدية يلي ممكن تنتقل عن طريق العدوى او المياه على وجه الخصوص؟

الامراض هي:

  • الاسهال
  • حمى التيفوئيد
  • شلل الاطفال
  • الامراض الجلدية الليشمانيا والقمل والجرب
  • التهاب الكبد

انت كمنشط توعية صحية حديثك رح يكون مركز على الوقاية أكتر من العلاج او كيفية الاصابة بالمرض لانو انت ما رح تستهدف بس المرضى انت رح تستهدف كافة فئات المجتمع يعني انت بتتدخل وبتحكي قبل ما يوقع المرض يعني تركيزك عالوقاية بالدرجة الاولى وانت مهمتك تمنع وقوع هي الامراض او تخفف من الاصابة بهي الامراض

هلق كل الامراض متفقين انو بالدرجة الاولى النظافة الشخصية والنظافة العامة هي شي اساسي للتخفيف من الاصابة بهي الامراض

- هلق شو هي الوقاية او طرق الوقاية يلي بدك تحكي فيها شو هي النظافة الشخصية بشكل

عام لكل هي الامراض؟

  • اول شي غسيل الايدي بالطريقة الصحيحة وبالاوقات المناسبة متل بعد الخروج من التواليت وقبل وبعد الطعام وبعد تغير حفاضات الرضيع وقبل ارضاع الرضيع
  • تاني شي هي غسل الخضار والفواكه قبل طبخها او قبل اكلها وعدم أكل الطعام المكشوف او البارد
  • تالت شي هي شرب المياه المعقمة والنظيفة معقمة اما عن طريق الكلور او عن طريق الغليان لمدة دقيقة
  • رابع شي عدم رمي القمامة جانب الحاوية وبدون كيس يجب رمي القمامة داخل الحاوية وداخل كيس محكم الاغلاق وخاصة فضلات الطعام
  • خامس شي عدم التغوط بالعراء وخاصة بالقرب من مصدر مياه ويجب استخدام التواليت والمحافظة على المرافق العامة كالتواليتات العامة وخزانات المياه وحاويات القمامة ووو الخ

انتبه لشغلة كتير مهمة انك انت ما بتحكي بالعلاج لانك مانك طبيب

هلق في طرق وقاية بتتعلق بامراض معينة متل:

الليشمانيا كيف بدك تحكي عن الوقاية من الليشمانيا

اول شي فكرة بسيطة عن حشرة الليشمانيا او فينا نقول ذبابة الرمل هي نفسها الحشرة يلي بتسبب حبة السنة او حبة الليشمانيا

الليشمانيا تسببها حشرة صغيرة جدا اسمها ذبابة الرمل يبلغ حجمها من 2 - 3 ملم تنشط عملها في الليل لا يسمع صوتها اثناء الطيران ولا يشعر الانسان بلدغتها تعيش وتتكاثر وتضع بيوضها في تجمعات القمامة والمستنقعات وشقوق الجدران والأماكن الرطبة والمظلمة

الوقاية من الليشمانيا :

اول شي يجب النوم في الليل تحت الناموسية أو النوم بلباس ذات اكمام طويلة

تاني شي عدم رمي القمامة وخاصة فضلات الطعام جانب الحاوية وبدون كيس مربوط وخاصة عدم رميها بالقرب من

مكان السكن لانها بتصير بؤرة لتجمع الحشرات وخاصة ذبابة الرمل يلي هي الليشمانيا

شلل الاطفال الوقاية من شلل الاطفال هي

1 - عدم التغوط في العراء

2 - تغسيل الايدي في الاوقات الحرجة

3 - شرب المياه النظيفة والمعقمة بالكلور

4 - أخذ اللقاح المتوفر ضد شلل الأطفال

5 - والاهتمام بالنظافة الشخصية بشكل عام وكمان عدم أكل الطعام المكشوف او البارد او الغير نظيف

- التهاب الكبد كيفية الوقاية من التهاب الكبد:

طبعا انت بدك تحط موضوع غسيل الايدي بكل مرض هاد امر أساسي

1 - شرب المياه المعق والنظيفة

2 - غسل الطعام او تقشيره قبل الطهي

3 - الاهتمام بالنظافة الشخصية بشكل عام

4 - أخذ اللقاح الخاص بالتهاب الكبد

- حمى التيفوئد :

حكيت عن النظافة الشخصية بشكل عام وبكافة انواعها بالاضافة على مرض التيفوئيد يجب أخذ الادوية باستمرار وبشكل

منتظم حسب ارشادات الطبيب في حال كنت عبتعمل جلسة مع شخص مريض طبعا

وتاني شغلة يجب عدم استخدام ادوات المريض وعدم اختلاطه بالاشخاص السليمين وخاصة الأطفال

وكمان من طرق التعامل مع مريض التيفوئيد اذا كان في مريض يجب خفض الحمى بقطعة قماش مبللة بالماء البارد واعطائه الكثير من السوائل كالشوربات والعصير

هدول البنود بيتعلقو بالاسهال بشكل خاص وبيتعلقو بكل الامراض بشكل عام وضيف عالاسهال الاكثار من شرب السوائل وخاصة مياه الاملاح من أجل تعويض الجسم بالسوائل يلي خسرها

- منجي على مرض القمل الوقاية من مرض القمل

اول شي قلنا الاهتمام بالنظافة الشخصية وهون خاصة الاستحمام بشكل مستمر يعني الاستحمام مرتين او 3 مرات في الاسبوع على الاقل

تاني شي عدم الاختلاط بالشخص المصاب وعدم استخدام ادواته وخاصة المخدة او الشرشف او المشط او الفراش اواللباس

تالت شي يجب تعريض اغراض الشخص المصاب الى الشمس بشكل مستمر ويجب على الاهل فحص الاطفال بشكل مستمر وتمشيطهم بمشط ناعم وعدم اختلاط الاطفال بالاشخاص المصابين وخاصة في المدارس بس القمل ممكن نحكي بطريقة العلاج اذا كان الشخص مصاب

ويلي هي كالتالي :

يمكن التخلص من القمل باستخدام شامبو خاص للقمل يجب فرك الشعر بالماء والشامبو لمدة 10 دقائق ثم شطفة وتمشيطه

بمشط ذو اسنان ناعمة

كرر هذا كل يوم لمدة اسبوعين بعد علاج القمل يجب التخلص من بويض القمل لان البويض يفقس ويعود القمل وان

التمشيط هو افضل وسيلة للتخلص من البيض او يمكنك ايضا فرك زيت الزيتون على الشعر مما يسهل في التخلص من

بيوض القمل

- جدول ال ( F ) شو يعني جدول F وشو علاقتو بالتوعية الصحية:

هاد الجدول بيوضح طريقة الإصابة بالأمراض وكيفية انتقالها وطريقة الوقاية منها اول شي رح نبدأ من عند البراز يلي هوي العامل الأساسي لانتقال المرض عن طريق اليد أو الحشرات أ الأرض ) النبات والخضروات ( أو عن طريق المياه

هدول الشغلات ممكن كلن ينتقلو للطعام ووالطعام مباشر الى الفم فتتم الإصابة بالمرض أنا هون بدي اقطع الطريق لمنع الإصابة بالامراض المعدية :

أول شي أنا اذا استخدمت التواليت بكون منعت وصول الحشرات للبراز ومنعت وصول البراز للنباتات ومنعت وصول البراز للمياه 

الطريقة التانية انا اذا غسلت اليدين بعد الخروج من التواليت بكون منعت وصول البراز للفم عن طريق الطعام لانو انا رح اكل بايدي وايدي نظيفة واذا غطيت الطعام رح امنع وصول الحشرات للطعام واذا غسلت الخضار والفواكة قبل الاكل بشكل جيد او طهيها بشكل جيد رح امنع حدوث الامراض المعدية واذا استخدمت مياه نظيفة ومعقة ومغطاة بشكل جيد أيضا رح امنع وصول المرض المعدي

الخطوط الحمر يلي شايفينها بالجدول هي الخطوط هي قطع الطريقة لعدم حدوث الامراض المعدية يلي ذكرناها فوق

- هلق حكينا عن كل شي بيخص الامراض وطرق الوقاية وفي شي بيتعلق بطرق العلاج المنزلي للتخفيف اوالشفاء من المرض

- هلق بقى بدنا نحكي عن شو هي الوسائل المستخدمة ونوع الجلسات والأنشطة

بالنسبة للتوعية الصحية انت عندك جلسات رجال وجلسات نساء وجلسات اطفال وزيارات منزلية

 الزيارات المنزلية

تتضمن استهداف كافة افراد العائلة

وعندك انشطة جماعية لموضوع مخصص مثلا بدك تعمل نشاط عن القمل بتحط خطة للنشاط الخطة بتتضمن مين هوي الجمهور المستهدف وشو هوي الموضوع يلي بدك تحكي فيه ووين المكان يلي بدك تعمل فيه النشاط والمدة الزمنية للنشاط وشو الوسائل المستخدمة بهاد النشاط هيك بتنشر التوعية الصحية

- هلق بالنسبة للوسائل المستخدمة

خلينا نقول اثناء الجلسات فينا نستخدم منشورات بوسترات بتحكي عن الموضوع يلي عمنحكي فيه او فينا نستخدم صور توضيحية بتوضح الموضوع يلي عمنحكي فيه

الصور التوضيحية بيجوز يسئلوك شو هي الصور التوضيحية ، الصور التوضيحية هي صورة وعكسها بتوضح التصرف الصحيح والتصرف الخاطئ لحتى توصل رسالتك بشكل توضيحي اكتر وتغير قناعة الناس من خلال هالصور والتصرفات الخاطئة والتصرفات الصحيحة

ممكن كمان اثناء الجلسات يستخدمو المنشطات الاناث ممكن يستخدمو كمان صور توضيحية وبوسترات وممكن يستخدمو عينات فوط نسائية مثلا أثناء الزيارت واذا تعذر وجود عينات نسائية فيهن يستخدمو البوسترات والصور التوضيحية هادالحكي خاص بجلسات النساء والمنشطات الاناث هنن يلي بيعملو هي الجلسات

جلسات الاطفال ممكن نستخدم العاب يعني نعلم الاطفال عن طريق لعبة منشان نوصلهن المعلومات بطريقة مبسطة وتدخل لذهنن

ممكن يقلولك مثلا عطينا لعبة او اذكر لعبة يمكن استخدامها اثناء الجلسة فيك تذكرلهن اكتر من لعبة

مثلا لعبة تشجيعية متل لعبة خرقة قماش مرسوم عليها نموذج تواليت ونستخدم كرة معينة بحيث تكون ثقيلة نوعا ما ونقوم

بتشجيع الاطفال على أنه من يقوم برمي الكرة داخل فتحت التواليت رح يكون هوي الشاطر والفائز ويلي بيرمي الكرة جانب فتحت التواليت بيكون خسران بس كمان شاطر هاد من نوع التحفيز وهيك بتوصل فكرة للاطفال انو لازم يتغوطو داخل التواليت وحصريا داخل فتحت التواليت وليس على طرف حجرة التواليت او بأرض التواليت بالاضافة لانك لازم يكون معك دائما دفتر للملاحظات تسجل عليه اي ملاحظة مهمة ممكن تعترضك

واهم نقطة لا تنسى شغلة انك تبلغ مشرفك المباشر في حال اعترضتك اي مشكلة وما بيصير تتجاوز مشرفك المباشر وما

بيصير تروح تحكي مع يلي اعلى من مشرفك المباشر الا بحالة وحدة ويلي هي انك انت تعرضت لمشكلة او عندك امر ما او مشكلة معينة خاصة فيك ورحت قلت لمشرفك المباشر اول مرة وتاني مرة وتالت مرة وما رد عليك او ما تجاوب معك ساعتها فيك تروح للاعلى من مشرفك وتحكيلو , بهي الحالة بس فيك تتجاوز مشرفك المباشر يعني بتتجاوز مدرائك بالترتيب اذا ما حدا رد عليك منهن

واذا يلي اعلى من مشرفك المباشر نفس الشي ما رد عليك بتروح للاعلى منو وبتحكيلو وهيييك لحتى حدا يرد عليك ويتجاوب معك حتى لو وصل الامر لمدير المنظمة


مع تمنياتي بالتوفيق للجميع ولا تنسونا من صالح دعائكم

أخوكم أكرم فارس غنيمي.

جديد قسم : نماذج

  1. الاندماج معه العائه ومعه الفرق وفارقه طوال الوقت إلى العمل

    ردحذف
  2. خبره في جميع الشروط والروح الرياضيه معه العمل أثناء المقابلات

    ردحذف
  3. عادل بشلاموني لدي خبرة بالاقناع باي اسبوب عن طريق منظمات توعية صحية والخبرةعلى البرامج والهواتف الذكية والتمكن من اللغة الانكليزية بالاضافة الي دراسة 3سنوات في جامعة الليسانس بدمشق مسبقا

    ردحذف
  4. خبرة في التوعية الصحية
    ممرض سنة 3 كلية التمريض

    ردحذف
  5. درست معهد لغة انكليزي وحبيت كتير اشتغل بمجال التوعية الصحية لاني بتوقع انو مافي تعقيد وكلو شغلات نحنا عايشينها ومنعرفها من ثقافتنا الشخصية ....لكن ماصحتلي الفرصة لحد الآن

    ردحذف
  6. كلية الحقوق وشهادة من الاكاديمية بالتوعية المجتمعية وشهادة بالدعم النفسي من شبكة حراس

    ردحذف

close